肥媽瑪利亞擁有的泉城控股公司，被彩娛集團以3,450萬港元收購51%股權，昨日在中環舉行簽約儀式，狄波拉、黃百鳴、夏韶聲及一班星光幫等到場支持。肥媽說：「我間公司本身有經理人、影視製作、演藝學校，因為要大量資金去搞製作，所以俾人收購可以有錢去運作，最快年底會開拍一部青春歌舞劇。」
指栢芝片酬合理
黃百鳴公司開拍的賀歲片《至強囍事》找來久休復出的張栢芝做女主角，據聞她的片酬高達1,500萬，黃百鳴說：「演員價錢唔想講，只可以講好合理。」有傳栢芝因接《至》片與恩師爾冬陞反目，黃百鳴說：「我唔知呢件事，只係我好彩，佢拍我呢部戲冇咁大壓力。」對於吳君如倒戈為曾志偉拍賀歲片《我愛香港》，黃百鳴也再一次與志偉在賀歲檔交鋒，黃百鳴說：「以為君如大肚，唔敢打擾佢。志偉眼紅我，佢見我拍《家有囍事》（系列）收得。」
採訪：魯萍
攝影：黃偉雄