朗尼（圖）同老婆高蓮喺杜拜搞緊箍煲之旅，但據聞此行好似唔太順利，朗尼兩口子嘅關係不但冇改善，佢哋仲喺餐廳吵大鑊，又唔瞅唔睬，講到情況好唔樂觀咁。不過，單嘢又有新發展，高蓮喺杜拜同一個英國遊客傾偈，其間個遊客問高蓮係咪同朗尼修補緊關係，高蓮就話自己同朗尼嘅關係唔錯，佢哋今次出走杜拜其實係想遠離朗尼早前嘅續約風波同召妓醜聞。高蓮話：「我哋好需要行開吓，要遠離煩擾，我哋只想要一點寧靜。」高蓮今次同陌生人講自己同老公嘅關係，莫非係想借人哋把口同外界作出澄清？其實朗尼早前已經為自己喺行為道歉，續約後又加埋人工，加上又有個囝囝要湊，兩夫妻真係可以唔啱傾到啱啫！