最近有位朋友，屋企嘅廚房同埋洗手間嘅天花有滲水問題，佢好勞氣咁話，諗住自己買咗家居保險，裝修費可以claim得返啦，點知由於事發時冇影到相嚟做憑證，所以保險經紀同朋友講話claim唔到喎。
朋友好㷫咁話：「以後屋企漏水滲水，唔係第一時間去處理啲漏問題，而係叫老婆搵部相機出嚟，影低漏水嘅相。仲要第一時間，唔係搵管理處上嚟睇，而係要打電話同保險經紀講，我屋企漏緊水呀！」
保險屬消費非投資
朋友咁講其實就誇張咗啲，但喺咁多類保險之中，家居保險其實係其中一項敏妮覺得，唔使一定要買嘅類別。冇錯，如果家居真係發生咗盜竊、水滲等等嘅意外，令到屋企財物有所損失，買咗家居保險嘅人，理論上就可以減低實際損失啦。不過，家居保險嘅保費，係按家居面積計算，每年一千幾百銀梗係唔少得。而家居保險連埋家具、電器同埋貴重物品嘅賠償額，驟眼睇落可能會覺得好高，但一般都有每件、每人或者每日嘅賠償上限，唔少仲有墊底費㖭。七除八扣之後，補償可能唔係想像中咁多。再計一計條數，家居怕且都唔會經常出意外，可能買咗幾年家居保險，先會咁唔好彩中一次招，付出咗嘅保費，分分鐘可能只係同收到嘅賠款差唔多。
不過，保險其實係「消費」而唔係投資，係當出現咗意外時，為自己提供保障，除咗投資相連保險之外，其實真係好少人希望買咗之後可以連本帶利攞得返，因為咁樣通常表示投保人中咗「jackpot」，搞到好大鑊。
就以家居保險為例，府上成為高空墮物黑點，引起第三者法律責任所獲得賠償，一定可連本帶利攞返保費，但相信冇乜人會想有咁嘅機會。
溫敏妮
http://wanmanli.com/blogs/