譚詠麟（阿倫）及樂隊Mr.前晚出席有線活動，在台上論盡娛樂新聞，早前被指爆樽爭女的Mr.成員Alan成為被玩對象，至於李家傑找代母產子一事眾人也不放過，阿倫謂會sms恭喜他，又講笑說「係唔係可以揀仔，可以分大份啲。」
譚詠麟、Mr.、謝安琪聯同有線主播前晚到九展出席「有線17周年呈獻譚詠麟×Mr.音樂嘉年華」，幾位有線主播在台上主持節目《大娛堂》，區永權抵死邀請嘉賓有料爆料，有樽爆樽，擺明擺Mr.成員Alan被指爆樽爭女一事上枱，他取笑Alan說：「你部相機喺邊度買？你係借相機、叉電機定借機呀？有冇後悔先。」Alan就強調沒有後悔。
眾人又拿李家傑找代母產下三胞胎開玩笑，當區永權指阿倫有傳聞時，阿倫即說：「乜嘢傳聞？唔通Mr.五個都係我生，但唔同姓喎。總之恭喜晒，朋友嚟（指跟李家傑），真係唔聲唔聲。」原本宣傳海報上有余思敏的名字，但大會指她要開廠，未能出席。不過眾有線主播連自己人也不放過，笑指余思敏去了紋身，好與鄭中基配成一對。
阿倫不失校長本色，與Alan合唱慢歌時，即場嚴格指摘他說：「我同你講過好多次，唱慢歌尾音唔可以咁rock，大聲唔代表勁。」Alan即尷尬謂自己出名嗌爆咪。
笑言出爆料書
事後阿倫透露曾為李家傑擔任活動大使，故彼此認識，他會sendsms祝賀對方做爸爸。對於李家傑找代母產子，阿倫說：「搵人好，好過搵烏龜嘅玳瑁，係唔係可以揀仔，可以分大份啲，講笑啫。唔使羨慕，我都有，生三個個肚係唔係好大，不過都值得開心。」
問阿倫有否興趣做爆料主持，他笑說：「若要人不知，千祈唔好話畀校長知。我要出本書叫《道聽倫說》，最考功夫係玩人哋，人哋又唔嬲，但如果正牌福祿壽（指他跟曾志偉和陳百祥）做節目應該冇人做嘉賓。」
採訪：李珮洳 攝影：陳俊強