皇家馬德里最近打到曉飛，日前又有好消息傳出，就係皇馬icon施丹（圖）會加入球隊嘅教練團，幫教練摩連奴管理同訓練球隊。其實施丹06年掛靴後，一直都有參與足球事務，仲喺皇馬做會長顧問同球會大使。摩帥過咗皇馬之後，亦曾公開叫施丹唔好成日留喺會長佩雷斯身邊，應該要多啲落球場同訓練場地幫手，咁先唔會浪費咗佢嘅能力。而施丹都作出回應，好快就現身教練團，佢仲會喺皇馬作客AC米蘭嘅歐聯分組賽首次跟摩帥出席賽事，大家到時記住留意。有施丹幫手，摩帥同會長佩雷斯之間就多咗個溝通橋樑，避免不必要嘅誤會，摩帥出招果然一家便宜兩家着！