由前英格蘭領隊艾歷臣（圖）帶領嘅英冠球隊李斯特城，啱啱喺英聯盃16強以1:4不敵西布朗出局，同時，李城喺英冠聯賽只取得3勝3和7負嘅劣績，排積分榜尾4，家唔好講話升班，就算想留級都成問題。對於喺英聯盃出局，艾歷臣就話李城班球員防守不力，仲要求隊波打防守時要消極啲，即係吓吓都大腳踢走個波就算，否則之後球隊嘅表現會繼續向下滑。李城今季13場聯賽失咗27球，平均每場失多過2球，數字上的確係偏高，但如果照艾歷臣講要後防踢啲咁消極嘅波，試問中前場球員又點組織攻勢呢？仲有，相信作為李城嘅球迷，都唔想見到自己嘅愛隊踢得咁肉酸，到時冇埋班球迷支持，你話點搞？艾帥都係諗吓點樣執好條防線好過啦！