PENTAX×Nanoblock　好砌得！

少女們總愛將閃石、貼紙左貼右貼，手機、相機、遊戲機統統唔放過。無他!想部機可愛啲，又唔使同人撞款囉，要將Kawaii升級，用「砌」嘅更有立體手感，PENTAXcrossoverNanoblock，砌上熊貓、小狗，仲可以DIY發揮創意，想同人撞款都幾難。

記者：符樂
攝影：王文忠

綠白機殼任砌

見到五顏六色的積膠，以為Lego都嚟出相機？非也！佢叫做Nanoblock，比Lego細好多o架！PENTAX同Nanoblock合作推出NB1000，機殼本身已經係Nanoblock，綠白兩種顏色，隨機附送一套積膠。綠色Safari，跟機送獅子；白色Monotone送你單車一架，這兩款是專為NB1000而設計，不作零售。
將佢成件砌上去又得，拆件DIY重新搞作一樣掂！唔夠零件仲可以另買積膠砌大佢，小狗、長頸鹿、狐狸，唔鍾意動物，揀部鋼琴、小提琴甚至巴黎鐵塔一樣有，但小心砌得太誇，部相機會拮手。

■鏡頭保護圈都係Nanoblock，可拆得。

■將獅子煎皮拆骨，再平鋪喺面，唔拮手之餘仲變成迷彩版！

■將單車重組，變成相機扶手，仲可以砌支閃光燈。

9種濾鏡　玩得又影得

NB1000外表雖玩嘢，但影相功能都幾全面，機身內置9種濾鏡，包括懷舊、柔和、魚眼、星星鏡等；最詭異的地方，係相機個Look已經夠玩具，機身竟內置玩具相機模式，拎住佢影玩具唔知係咪有Feel啲呢？濾鏡用法，是影相後再加上去的，即係話同一張相，可以分別加上不同的濾鏡效果，㩒幾下就搞掂，快過用Photoshop。