曼城啱啱先喺英超主場以0:3輸畀阿仙奴，賽後仲俾阿仙奴嘅法比加斯暗寸佢哋，就算佢哋出15個人，都贏唔到阿仙奴。不過，曼城嘅阿當莊臣、巴利、基雲同赫特就一於好少理，仲約埋去派對，其間仲飲酒作樂，雖然佢哋幾個都冇醜態百出，但牽涉到個酒字，唔激死領隊文仙尼至奇。
學生派對飲到凌晨
話說曼城喺周日輸波後，上述4個曼城球員就約埋去蘇格蘭打高爾夫球兼度假，到周一晚上佢哋就喺當地參與咗一個學生搞嘅派對，其間啲球員都有飲酒，仲玩得好高興。不過佢哋都冇飲醉，最後玩到凌晨兩點幾就散水。
雖然今次係冇出事，但佢哋似乎挑戰緊領隊文仙尼嘅底線。事關早排文仙尼先表示，寧願球員搞女人，都唔好有飲酒習慣。文仙尼咁講其實都係想球員嘅職業生涯長一啲，但上述幾位球員就當耳邊風，佢哋仲要揀喺球隊輸波後開派對，真係唔抵幫！同時，出晒名好注重旗下球員行為嘅阿士東維拉領隊侯利亞又加把口，話容忍唔到球員夜夜笙歌，又叫佢哋要專心踢波，唔知攞景定贈興，總之「曼城4子」真係要好好反省吓！
泰維斯被爆思鄉病
講開曼城，佢哋仲有唔少負面消息，據失意前鋒辛達告魯斯講，泰維斯家好掛住喺阿根廷嘅家人，但辛達告魯斯亦補充，泰維斯會到2014年合約完結後先諗返唔返老家，反而佢就意興闌珊，自己1月走嘅機會好大。點都好，泰維斯一向都係麻煩友，佢同領隊文仙尼嘅關係亦唔係太好，如果佢仲唔收拾好心情發展事業，畀人一個好印象，遲啲真係想搵人要都難！
話你知：赫特隊酒有前科
唔知英超球員壓力係咪特別大，所以經常飲酒減壓，但有啲球員就比較冇節制，仲玩到離晒譜。好似曼城兼英格蘭國家隊正選門神赫特（中），早排就被影到喺歐國外開戰前，喺夜店飲酒攬女狂歡，仲要玩到凌晨5點幾，認真唔自律。另一英超球員艾殊利高爾，09年就喺夜總會飲酒後大鬧警察而遭逮捕，希望一眾英超球員以後飲酒前都要三思。