回歸前借調到臨時特首辦幫老董手嘅前高官羅范椒芬，離開政府後專心搞家族教育基金，近日有新動向，又再同老董合作，擔任老董創辦嗰個中美交流基金會義務特別顧問。
中美交流基金會做高層次民間外交工作，一般人對呢個組織好陌生，基金會噚日宣佈羅范同前理大常務副校長曾慶忠做義務特別顧問，總幹事盧古嘉利則起身，由貿發局前副總裁黃錦輝接任。盧古嘉利亦係前高官，幾年前離開政府後幫老董手，過夠冷河，稍後會轉投商界。
盧古嘉利好豪氣，捐100萬元畀基金會，轉做基金會顧問。老董在位時不太受公務員歡迎，估唔到官員退下來之後，咁有緣泊上佢個碼頭。