劉德華將於12月舉行20場紅館個唱，今次他會化身舞王，挑戰自己在個唱上嘗試表演多種不同舞蹈，還重金禮聘曾幫米高積遜（MichaelJackson，簡稱MJ）編舞的排舞師來港，為他進行密集式鍛煉。華仔笑言第一天排舞已感到生不如死，但牛華當然冇咁易被打倒，最後還得到排舞師的讚賞。
劉德華正積極為12月在紅館舉行的20場演唱會進行密集式鍛煉，今次他更專程由美國找來曾為已故國際巨星米高積遜「ThisIsIt」演唱會排舞的TravisPayne及StacyWalker，來港為其演唱會度身訂做最新舞步。
笑言感生不如死
問華仔為何會找上米高積遜的排舞師，他說：「其實一路都想跳舞，好想試好多唔同類型嘅舞，之前喺網上睇過一啲片段，都係跳MichaelJackson嘅舞，想像吓佢嘅舞，世界各地嘅人都可以接觸到，演唱會入邊有一part係向佢致敬，所以就有今次合作。」他表示每次演唱會都想將最好的演出獻給觀眾，還透露將在個唱中跳中國舞和標準舞等，實行來個舞動全城。
華仔跟兩位美國排舞老師排練了十多天，問他感覺如何？華仔笑說：「生不如死呀，第一日排舞我已經好想走，真係有啲困難，好似要將我個頭同手腳分開晒咁，要好有節奏感，好有壓力，以前跳舞可能係飛來飛去，靠舞台效果，今次就真係堅跳，頭一個星期真係失眠o架。」
華仔又大讚兩位老師說：「同佢哋合作非常好，好舒服，仲好體恤我，首先會睇吓我點跳，一有乜嘢做得唔好就即刻提點我，即刻幫我糾正錯誤，然後再睇吓有乜嘢係屬於我嘅舞步留低，再加上佢哋嘅概念，因為錯一個step都會跟唔上，所以我要更勤力，以前同我排開舞嘅，可能知我邊啲跳唔到，會就我改動作，但佢哋就唔會，所以可以push我，做啲以前做唔到嘅動作。」
被讚勤力有主見
出名勤奮如牛的華仔，豈會輕言放棄，為了不在外國人面前失禮，除平日跟老師排舞外，回家後也不停自行練習，他說：「每次排完舞，我要自己喺屋企再練多三次，仲要三次都唔可以出錯，咁先畀自己瞓覺o架。」果然不愧其牛華稱號，連兩位老師知道華仔的花名叫牛華後，也異口同聲表示贊同，並大讚華仔勤力又可愛。見華仔自嘲不懂跳舞，TravisPayne還直言不相信，並指華仔清楚知道自己想要甚麼，願意花大量時間練習，勤力得令人驚訝，很少superstar會如此用功。
採訪：胡比 攝影：陳順禎