四叔抱孫全城驚奇，中環熱論不絕，立法會議員噚日都冇乜興趣辯論施政報告，連北京官方新華社都湊熱鬧，噚日引述香港傳媒報道李家添咗三個新成員消息，向全國同胞報喜。
新華社報道李家喜訊
近年以炒股成為市民偶像嘅四叔，被新華社封為「著名實業家」，至於李家傑則係「超級鑽石王老五」，外界唔知四叔對分身家有決定未，不過新華社報道指李家傑「坐擁千億家財」，咁快披露李家最高機密，唔通北京已有靈通消息？
同係姓李，八方對於宗兄以咁破格嘅方法繼後香燈，佩服得五體投地，商界議員林健鋒噚日爆料，話其實唔少商界人士都為咗生育下一代而煩惱，不時聽聞有人想搵代母生仔，呢次李家傑一索三男，令無數鍾意生BB夫婦躍躍欲試。
商業代母家陣在香港不容於法，林健鋒話既然需求呢種服務者眾，當局應該為此拆牆鬆綁，喺六大產業之外，大力發展第七產業，就係代母產業，打造香港成為代母港，唔好又俾北方佳麗壟斷，林健鋒認為呢個行業潛力甚大，希望政府唔好又議而不決。