超強颱風鮎魚過門不入香港，唔少網民都笑言全靠李氏力場發功，不過港區人大代表譚惠珠就爆堅料，指個風打唔成同李氏力場無關，而係全靠另一股超自然力量。
珠姐係警察隊員佐級協會創會會長，噚日出席協會新一屆委員會就職禮時爆料，話鮎魚吹唔正香港全賴有香港精神。至於乜嘢係香港精神，珠姐就吹到去馬尼拉人質事件，話Jason奇蹟能夠康復、旅遊巴內領隊盡忠職守、開槍一刻有港人奮不顧身救人，統統都係香港精神，又話在香港，只要唔犯法，心裏有乜希望，都有機會做到喎。
兜咗好大個圈，最後就教班警員，如果員佐級協會盡力同佢哋爭取權益，到最後即使有乜唔如意，應該吞咗佢算數。哦，原來忍得，都係香港精神。