近排掀起功夫熱，有網民早幾日搭的士，發現位的士大佬揸車，手勢非常奇特，以「四両撥千斤」嘅招式，將個軚盤撥來撥去，十足十耍太極，於是用手機拍低全個驚險過程，仲形容呢位司機大佬係的士界一代宗師。有網民講笑話，呢位的士大佬咁好功夫，個的士牌唔知係咪打番嚟。
八方好彩冇遇過呢位的士宗師，香港汽車高級駕駛協會主席蒙海強亦指咁樣揸車好危險，因為馬路如虎口，司機幾時都應該手握軚盤，萬一遇上突發事故，好似片中呢位仁兄，隨時反應唔切。
一旦發生意外，可能會被控不小心駕駛罪，唔單止要扣分，仲最高可被罰款5,000元以及監禁半年，呢位的士宗師，為人為己，唔好隨便耍功夫好喎。
睇片 http://www.youtube.com/watch?v=hYzeJ7bDQiw