現年28歲嘅混血名模Rosemary上月初喺美國內華達州，參加當地火人節期間，因為涉嫌藏毒及撞車後不顧而去，兩度被捕。Rosemary嘅涉嫌藏毒案，噚日香港時間凌晨時分喺內華達州法院首度提堂，原定被告（即Rosemary）要出庭，但佢經美國律師申請，獲得豁免上庭。
何國鉦：佢未知情
經法庭初步聆訊，決定另定下次提堂日期，延期到下年2月9號，但Pershing縣區域檢察官BryceShields透露，Rosemary屆時將唔需要出庭應訊，法院會再研究係咪有足夠證據先決定係咪起訴。Rosemary嘅代表律師TammyRiggs就再次強調Rosemary係清白嘅。
另外，自從事件上月發生後，Rosemary一直避開唔見人，更同男友避走法國，之後又去咗印度靜修。
Rosemary休息咗成個月，今日終於復工，佢會喺北京出席中國時裝周，幫香港設計師何國鉦行騷。何國鉦噚晚透露同Rosemary通過電話，但Rosemary對案件延期表示唔知情，何國鉦喺電話度講：「佢原本由印度飛北京，家返咗香港先過嚟，佢對case都唔知，仲話『真的嗎？我未知道。我不想評論住，只想全副心思行好時裝騷，做好工作。』我覺得佢心情都幾好，幾輕鬆。」
至於近期忙於離婚案嘅Rosemary媽咪Julie就話：「個女嘅事我全不知情，佢家喺北京做嘢，對唔住。」