社運人士楊匡因為保護豆腐、扯女警「冧巴」被判襲警罪成坐監14日，雖然刑期唔長，但懲教署都勞師動眾，將佢由荔枝角收押所轉去赤柱東頭懲教所，一班戰友兩脇插刀，楊匡入咗去咁多日，就聲援足咁多日，喺監獄外同時「坐監」，點知噚日去到赤柱東頭，發現嗰度已經劃好咗記者區同公眾活動區，個公眾活動區細到紮唔到營，戰友阿橙話天氣開始轉凉，如果唔紮營嘅話一定冇覺好瞓。
阿橙仲話，有社運失魂魚唔知楊匡轉咗去東頭，盲舂舂走去荔枝角聲援，去到先至發現之前佢哋紮營個位俾懲教署用磚頭封咗，有職員仲叫佢哋唔好再嚟，唔通職員有預知能力，知道仲有其他社運人士要入嚟？