新立法會大樓明年5月落成交樓，預計9月啟用，三軍未動，糧草先行，本年底招標新大樓餐廳營辦商，由於呢間餐廳照顧尊貴議員三餐，記者都有機會享用，因此秘書處稍後會舉行試食會，啱食先拍板，至於使唔使公投呢？呢個係敏感問題，暫時未有答案。
搬新屋一闊三大，保安員人數要由現時30人擴充至90人，新保安主管年底返工，據講係剛退休警務人員，見過唔少大場面，保護議員、官員不成問題。
秘書處請人要求高
下屆立法會議員增至70人，意味會議數目、時間都會增加，秘書長Pauline透露議事規則委員會要研究修改會議規則，例如逢周三立法會會議，現時六條口頭質詢及兩個無法律約束力動議辯論嘅安排可能要改，總之議員唔會少咗提問同發言時間。
下屆立法會開多咗會，秘書處亦都要相應增加人手，不過請人甚難，因為要求高，要有最少六年相關經驗，又要中、英文好，唔怕捱抵得諗，分分鐘要啃埋議員嘅死貓，咁嘅人才，邊度搵？