CASBAA（亞洲有線與衛星電視廣播協會）有個調查顯示，亞太區收費電視有成3.36億客，仲多過北美嘅1.21億人；但係相關嘅收入，就仍然係北美洲最高，今年就有近8千億，而亞太區就少得多，得1800億咁大把，唔通喺亞洲搞收費電視冇乜肉食？
華華點諗都諗唔明，點解亞太區多人哋北美成2億個客，都可以賺少咁多？CASBAA副行政總裁JohnMedeiros（馬德朗）話，亞太區係就係最多人睇收費電視，但由於人均收入仍然偏低，加上盜版猖獗，服務商實際落到袋嘅真金白銀唔係好多。
佢哋估計，亞太區市場因為盜版問題而賺少160億左右，政府又因為咁而收少咗20億稅。而「除了騙子甚麼都是假」嘅中國，就係呢啲盜版設備嘅主要供應地，因為內地普通家庭睇唔到外國嘅收費電視，所以對盜版設備需求特別殷切，而呢啲設備亦出口到區內其他市場……唔知蔡衍明知道咗之後會唔會後悔有呢單新刁？所以搞傳媒搞電視台，副身家無番一百幾十億都咪制。