廣州亞運下個月揭幕，正常香港人對睇亞運賽事興趣不大，一班區議員卻想見識吓，建議力主申辦亞運嘅民政局德成局長帶隊去欣賞亞運開幕式，既然港府想申辦亞運，議員去觀摩吓好應該。
與民同樂係民政局職責之一，不過德成局長呢次就托手踭，事關亞運開幕式門票好揦脷，閒閒哋要五、六千蚊一張，德成局長坦言唔方便花大筆公帑上廣州，不過為免區議員不滿，局長反建議，帶隊去機場亞洲博覽館睇動態版清明上河圖，呢個活動慳皮好多，每人10蚊雞入場費，民政局請又點話。
雖然各政黨都唔支持申辦亞運，但德成局長好敬業，導演未嗌cut照舊四出諮詢，民建聯有人雪中送炭，東區同西貢兩個支部向黨中央申請豁免，但民建聯中委暫時無意轉軚，仍然維持反對立場。