「裕華國貨，服務大家。」呢兩句老牌國貨公司裕華嘅宣傳歌詞，近日喺九龍塘好多人唱，因為有51年歷史嘅裕華國貨殺入九龍塘，不過唔係開分店，而係進駐浸會大學，老店並非在浸大開新舖頭，雖則浸大有中醫藥學院，不過國貨公司都冇需要入去賣中藥，而係國貨一哥早前捐咗筆錢畀浸大，浸大投桃報李，將傳理視藝大樓嘅演講廳命名為「裕華國貨演講廳」。
大學幾變商場
大聽日會為演講廳舉行冠名儀式，據講裕華今年中已捐款，款項用以支持浸大校園擴建計劃同當代中國研究所研究項目，裕華捐咗幾多錢校方暫未透露，校內人士指，以前曾有商人捐款幾百萬元，已獲演講廳命名答謝，呢方面，浸大素來好慷慨。
富豪捐款本地大學唔係新鮮事，最大爭議嘅相信係港大醫學院冠上首富大名，各間大學處處都有富商留名，浸大校內亦遍佈富商名字，師生職員一向冇乜意見，不過今次裕華捐錢獲演講廳冠名，就引起一啲議論。有教授同八方講，得悉校方將演講廳冠名「裕華國貨」，聽落覺得有啲突兀，部份學生亦感到奇怪，教授強調唔係反對將設施冠名答謝善長，只係今次好似稍為hardsell，其實只命名裕華，唔用國貨兩個字，感覺可能好啲，「今次冠名咁有創意，一時間唔容易接受」。
大學入面忽然有個裕華國貨名牌，驟眼睇確係有啲格格不入，浸大政治及國際關係學系副教授陳家洛對此都有意見，佢話本地大學四出撲水，乜鬼嘢都好似有個價咁冠名，接近「無所不用其極，來者幾乎不拒」咁籌款，無非都係因為政府對大學嘅開支承擔越嚟越少，否則大學又點會變成商場咁，四處都係商業機構招牌？
國貨公司式微
上世紀七、八十年代國貨公司好興旺，小市民買日用品衫褲鞋襪固然要幫襯，買大閘蟹都要去國貨公司，後來日資百貨公司崛起，國貨公司生意越來越難做，裕華尖沙嘴及中環兩間舖去年結業，化整為零在多區開中成藥店，努力求變。
mailto:[email protected]