電子版《清明上河圖》60萬張門票6日內全被掃清光，部份係由旅行社總動員派人掃飛，順便乘機搞埋海鮮團；劉德華18場演唱會又被迅速搶撲一空，音樂界才子話啲貴飛大部份都係俾內地人搶晒，當然贊助咗佢幾年嘅東亞銀行及某某鑽石店都擸咗唔少，佢哋更組團落嚟香港睇演唱會。
仲有一個細小嘅新界區單位，竟然又可以引來四路買家搶奪，只因層樓係市場上現存少數仲係二百萬樓下嘅盤源之一，釐印費只係盛惠100蚊，炒賣成本一味夠輕；不過，點都唔會令人費解得過香港人專登揀啲堆填區、垃圾轉運站嘅盤嚟當寶咁炒賣。
香港咁鍾意抄人家外國，又唔見抄下人哋嘅豪宅從來唔會建築在上述嘅設施附近。對外國人而言，呢種簡直係香港嘅奇景，嚟香港睇《清明上河圖》或劉德華演唱會，不妨順便睇埋十大臭盤奇景。
呢類物業閒閒地仲要賣緊萬幾兩萬蚊一呎，香港人就無理由話唔知，最奇嘅仲係連內地人都以呢啲地區為投資首選，交通樞紐作為最大賣點。
價值觀已扭曲
資產泡沫席捲全球，總之見人搶得開心就以為係好嘢；咩叫做好，咩叫做唔好，金融海嘯後價值觀已經全面扭曲，唔好嘅好似都變晒有寶咁。
股票亦然，7月中寫過「龍頭失勢、奀仔發圍」叫大家捨棄情意結把中國人壽（2628）換馬至中國太保（2601），又唔見有人肯跟！我點知？因為從來都無股民打嚟問過隻太保，到家仲係問隻國壽，你都無癮啦！
呢個事實，終於證明咗我唔係一個好嘅推銷員，當年脫離經紀嘅決定係正確。
家嘅股民，見有人追貨就以為係好嘢，誰不知一個屈尾十俾人裝番轉頭，睇吓隻中鐵建（1186）大跌前點樣掃高就知。
胡孟青
獨立股評人