花旗股市前晚早段走勢幾強，道指曾經升破11200關，指數由高位回落，收市升幅收窄，不過炒上嘅勢越嚟越明顯，相信破關嘅日子已經唔遠。
港股繼續窄幅波動，恒指全日高低位只差181點，大部份時間指數都冇乜變動，明日就係期指結算，好淡雙方可能會加大力度，不過，如果花旗股市未出現突破，港股暫時都只會維持窄幅拉鋸局面。
國航C輪22312：中國國航（753）噚日報收11.42元，升0.8%。股價9月初見底回升，靠近11.40元掉頭下試10日同20日線，橫行兩個禮拜，股價又有再炒嘅迹象，噚日升破11.40元收市，短線料上試12.70至13元，可以諗吓隻C輪22312。
隻輪現價19.2仙，2010年12月22日到期，行使價9.80元，溢價2.6%，引伸波幅52.4%，槓桿率6倍（有效4.8倍），正股見13元，22312睇33仙，正股跌穿10.86元就沽咗隻輪。
俊樺