民建聯黃定光係保皇黨，噚日卻話同社民連長毛係同黨，同屬「煙鏟黨」。60名立法會議員，僅佢哋兩個係煙民，作為少數族群，黃定光話應受到保護，偏偏政府越來越多禁煙措施，搞到佢哋吸啖煙都心慌慌，年底公共交通交滙處全面禁煙就就好擾民，「分分鐘踩入地雷區，炸死都唔知碇，如果突然有個控煙辦（人員）出現，好慘，（罰）1,500蚊」。
黃定光煙齡40年，以前一日一包，家一包食兩三日，「一日開會開到黑，多謝立法會囉，少咗機會食」。屋企人叫佢戒，但佢戒唔甩。佢噚日連珠炮發狠批控煙政策，指入境限帶19支煙呢個「19政策」，擾民到極，「官員唔好閉門造車，坐喺冷氣房想當然」。佢話煙民怨氣重，不利政府施政。