球星後代往往因父之名而成為焦點，無論效力邊個級別聯賽，喺球場上表現不時都會被外界同父親昔日英姿比較；結果，曼聯名將布魯士同舒米高嘅囝囝，就成為咗日前英冠賽事主角，仲要係出醜嘅主角。
對於英冠嘅列斯聯嚟講，後防線真係極具星味同份量，因為中堅布魯士正係現任新特蘭領隊布魯士之子；門將就係小舒米高，「丹麥鋼門」舒米高喺球員時代，已經帶佢當時細細個嘅囝囝卡斯柏舒米高出嚟見人，甚至有意將小舒米高塑造成「鋼門二世」，希望佢他日事業有成。
累列斯聯輸4蛋
以往曼聯後防有布魯士同舒米高在陣，真係穩如泰山，但小布魯士同小舒米高喺周一嘅英冠直播戰就丟晒老竇嘅架。皆因「雙小」周一對卡迪夫城一役上半場22分鐘時，喺對手前鋒保夫萊特畀少少壓力之下，就出洋相；小布魯士想讓傷癒復出嘅小舒米高出迎接住皮球，點知有誤會，小舒結果「屙蛋」，最後被保夫萊特射入空門先開紀錄。之後列斯聯兵敗如山倒，結果主場淨吞卡迪夫城4蛋，慘敗一場。
雖然話小舒米高之前受到腳傷困擾，唞咗成兩個月到今場先復出，唔好對佢有咁大期望，但列斯聯領隊加利臣賽後就一於冇面畀，大鬧「雙小」犯呢類低級錯誤唔可以接受。其實小舒米高都叫做喺曼城出身，外借過唔少球會，好似高雲地利、福爾柯克同卡迪夫城咁，而且網上亦有部份佢精采撲救，甚至補時階段助攻到對方門前「車身」抽射，功架十足；但星途始終麻麻，睇嚟真係要好似佢老竇咁，遇到一位好領隊先至有機會出人頭地。
小布魯士踢極未企穩
至於小布魯士亦係星運平平，小時候曾經喺曼聯受訓，但16歲被踢走，輾轉落到布力般流浪；今年由葉士域治轉投列斯聯，球隊成績亦一般，對家26歲嘅小布，想衝擊頂級聯賽機會唔大咯。
話你知：老舒米高地位超然
布魯士同舒米高可說係90年代「曼聯王朝」的主要成員，前者其實喺87年已經加盟紅魔鬼，較舒米高的91年還要早。兩人喺曼聯期間，就協助球隊3次贏得英超聯錦標、兩屆英足盃冠軍。當然，舒米高喺曼聯嘅成就，比起布魯士更大，因為「丹麥鋼門」係紅魔鬼99年成為3冠王不可或缺嘅功臣，係一代門神，就算現今嘅雲達沙，都好難同佢相比。