從未攞過日聯冠軍嘅名古屋鯨魚，家喺積分榜暫時排首席，拋離第2、第3嘅鹿島鹿角同大阪飛腳8分，但咪以為鯨魚最後7仗可以Hea，因為佢哋有兩大主將金崎夢生同田中鬥莉王（圖）受傷要唞3周；如果之後稍有差池，鯨魚隨時好似07年浦和紅鑽咁，臨尾失咗個冠軍！
日聯仲有7場聯賽要打，鯨魚之後會對大阪櫻花、鹿角同廣島三箭等勁旅，硬仗多，又有大將缺陣，尤其今季加盟嘅鬥莉王地位極重要。仲記得喺07年嗰屆聯賽，紅鑽本來穩守首席執盃耳，但到最後5仗就瘋狂失分，結果俾踩行油嘅鹿角以兩分之微壓過，睇嚟鯨魚一定要打醒十二分精神！