黃竹坑南灣海景酒店（L'hotelIslandSouth）正式開幕，左丁山前往參加開幕酒會。因賓客太多，黃昏時候，酒店附近道路頗為擠塞，酒店內亦水洩不通，此酒店屬華懋集團所有，華懋進軍酒店業，請咗Sylvia大姐做掌舵人，Ｓ大姐當然經驗豐富啦，以前做過富豪酒店集團、美麗華酒店（現稱MIRA），對四至五星酒店之運作及推廣，工多藝熟且頭腦靈活，噱頭多多，由佢做開荒牛，乃不二人選。黃竹坑將來會逐漸變成商貿、酒店以至住宅地區，南灣酒店位於工業大廈旁，相當接近香港仔隧道與海洋公園，唔算唔方便。
喺酒會碰到老總Ｓ，有啲意外噃，老總Ｓ話佢自西雅圖回港小住一段時間，就係住在呢間酒店，在黃竹坑道搭巴士去九龍城廣場與老友吃午飯，半個小時就到，十分快捷，仲話自中環坐的士來此吃午飯，同去銅鑼灣冇乜分別啫。
走出酒會，立即飛的入沙田馬會會所，到百駿廳應約，品嚐米芝蓮三星級法國名廚AlainPassard嘅出品，呢位名廚來沙田馬會獻藝五天，由十四號至十八號，因號召力好大，平時幾清閒嘅百駿廳晚晚滿座，滿足五晚，向隅者眾。Passard設計一張菜單，由頭盤至甜品，共七份食物，配四種白酒紅酒，由佢揀選，每位收費一千六百元，唔算貴，入到去，只見馬會董事葉澍堃與朋友坐在一張大枱，葉大董係米芝蓮食評家噃，有份參與本港米芝蓮食肆嘅挑選工作，市面上每逢有名廚表演，好多時會在現場。好唔好食，佢一試便知，廚師呃唔倒佢。
呢晚七道菜，味味細細哋，初時以為好似日本懷石餐，好多嘢食，但食極唔會飽，點知唔係，嘩，去到最後一個主菜黃汁雞，胃納已滿，雖然只得幾小塊，都想唔食。但一試之下，乖乖不得了，雞塊嫩滑無比，黃汁夠鮮夠香，刺激味蕾，配件靚雞肉（四小時慢煮而成），咬一啖就捨不得放低，幾大都要食晒成碟，侍應話黃汁係Passard嘅秘方配製，每碟雞所配嘅黃汁，成本已要數十元。吃畢，Passard似藝人視場咁，走出嚟同每位客人握手致謝，逐一枱與客人拍照留念，對佢嚟講廚師豈只係煮菜，而係一位美食創作藝術家。