「萬人迷」碧咸雖然已30有5，但就由英格蘭威到過大西洋彼岸嘅美國；佢喺周日美職聯協助洛杉磯銀河以2:1反勝到訪嘅FC達拉斯，令球隊成為今屆常規賽冠軍。如果奪標大熱嘅銀河喺季後賽成為總冠軍，碧咸就可以成為歷來第2位，喺3個唔同國家聯賽封王嘅英格蘭球員，認真巴閉！
入波助銀河做常規賽1哥
碧咸由曼聯響朵，協助球隊奪得英超聯之後，喺西甲皇馬發展雖然唔算太如意，但起碼都協助「銀河艦隊」贏過一次西甲錦標；之後橫渡大西洋嚟到名副其實嘅銀河球隊洛杉磯銀河，都發展得唔錯，上屆已有機會捧走美職聯總冠軍，可惜喺總決賽功虧一簣，互射12碼不敵皇家鹽湖城飲恨。
今年碧咸經歷咗唔少唔如意嘅事，包括3月足踝重創無緣南非世盃，之後又被英格蘭主帥卡比路同AC米蘭教頭艾基利嫌老話唔再用佢；但碧咸一於少理，以行動證明自己仲係得嘅，結果佢9月復出，比預期早咗個幾月，仲不時成為銀河贏波功臣。
傳艾歷臣借碧咸踢李城
喺周日常規賽最後一仗，原本只要攞1分就可以成為常規賽盟主嘅銀河，喺22分鐘已被FC達拉斯射入而落後；好彩碧咸喺11分鐘後追番，佢仲不知幾搏，激戰至血染球衣！結果，銀河憑祖連奴下半場初段建功反勝2:1，繼02年後再次成為常規賽冠軍；喺02年嗰屆，銀河仲順利咁首次成為總冠軍，認真好兆頭。
如果銀河贏埋總冠軍，碧咸就會夢想達到，繼前愛華頓球員史堤芬（TrevorSteven）後，成為歷來第2位喺3個唔到國家奪得聯賽冠軍嘅英格蘭球員。雖然銀河喺季後賽首戰，就要同有瑞士射手尼古科壓陣嘅西雅圖海灣者交手，但碧咸一於冇有怕：「對FC達拉斯呢場常規賽煞科戰，畀到我同隊友一個好好嘅考驗，既然呢關都順利闖過，相信冇嘢難到我哋。」另外，有傳現任英冠李斯特城領隊艾歷臣，想喺美職聯收「咧」後，搵碧咸返英倫踢波，再次同呢位前英格蘭國家隊領隊合作咁話。
話你知：史堤芬前無古人
史堤芬（TrevorSteven）係邊個？佢係前英格蘭國家中場，喺效力愛華頓期間（1983至89年）成名。無獨有偶，史堤芬同碧咸一樣都係司職右中場，而且佢嘅右腳出波準繩度，仲分分鐘拍得住碧咸。史堤芬最厲害嘅地方，係唯一一位英格蘭球員可以喺3個唔同國家嘅聯賽奪標，喺1985同埋87年替愛華頓捧走英格蘭頂級聯賽冠軍；之後無論佢效力蘇格蘭嘅格拉斯哥流浪抑或係法國嘅馬賽，都能順利替球隊於聯賽奪標，勁！
史堤芬
國籍：英格蘭
出生日期：21/09/63
位置：中場
國際賽紀錄：36場入4球
曾效球隊：般尼、愛華頓、格拉斯哥流浪、馬賽
曾奪聯賽錦賽：英格蘭頂級聯賽（愛華頓）
蘇格蘭頂級聯賽（格拉斯哥流浪）
法國甲組聯賽（馬賽）