世紀強風「鮎魚」移動飄忽，香港逃過一劫，係咪李氏力場發威呢？同樣都係姓李嘅台長李本瀅，噚日學煲呔回應劉曉波得和平獎個答案：「不予置評。」
鮎魚譯名南韓提供
市民思疑官商勾結，天文台都要睇住個市掛風球，台長話掛波唔會考慮對經濟嘅影響，總之有需要就發出：「一個波都不能少。」不過為免引起混亂，除非有突變，否則唔會喺返工返學期間發八號波。今次鮎魚進入香港800公里警戒範圍，但都未掛一號波，台長話因為本港風力未達標，太早掛會擾民，例如可能會令漁民停止作業，又唔想連掛幾日一號波，令市民變得鬆懈。唓！咁講法，即係掛波唔係純科學決定啦！
鮎魚殺到之前，台長話好緊張，上星期三捱通宵只瞓一個鐘，上星期四瞓四個鐘。鮎魚係南韓提供嘅Megi中譯，天文台話中文譯名係南韓提供，日、韓都係用鮎字，呢個係異體字，唔係大陸嘅簡體字。台長又指今年已有出現拉尼娜現象嘅條件，至於今個冬天係咪特別冷，要睇多一兩個月數據才說得準。