近年經常有球員喺球場猝死，西維爾中場佩亞達就係其中一個案例。周日一場西乙又出現驚險情況，喺沙拉曼卡主場對貝迪斯踢到下半場早段時，主隊嘅31歲中場米基爾加西亞（圖）突然心臟病發暈低，心跳一度停頓，好彩醫護人員及時趕到進行急救，米基爾加西亞先可以保住性命。
場波打到60分鐘，米基爾加西亞喺中圈附近綁完鞋帶企番起身，之後突然暈咗，有隊友即時跑到佢身邊，仲叫其他人唔好行太近，要畀米基爾加西亞呼吸到多啲空氣。同時，幾位醫護人員已趕至，即刻同米基爾加西亞急救，其間唔少沙軍球員都緊張到喊咗出嚟，好彩經搶救後米基爾加西亞情況已穩定。經過佩亞達呢啲悲慘教訓，球場已增設唔少急救設備，但我哋都唔希望再有類似情況發生。