港股連續第4日緊貼10日線整固，恒指噚日報收23627，升110點，成交同上禮拜五差不多，恒指全日窄幅上落，期指以轉倉為主。
內地股市向好，升幅顯著，係繼續炒上格局，對港股有利。花旗股市嘅大勢仍然向上，一旦道指突破11200，向上嘅動力會加強。港股未向上突破24000關之前會繼續炒個別，煤股有勢，潛在上升空間吸引。
神華C輪23038：中國神華（1088）噚日報收36.20元，升3.5%。股價之前上試36元遇壓回落，上禮拜下試20日線後迅速反彈，整固兩日之後，噚日以大成交破10日線炒上，同時升破36元關，短線將上試41元，可以諗吓隻C輪23038。
隻輪噚日報收41仙，2011年1月4日到期，行使價33元，溢價2.5%，引伸波幅34.6%，槓桿率8.8倍（有效6.7倍），正股升上41元，23038睇82.2仙，升幅達1倍，都幾吸引，正股跌穿34.80元就沽咗隻輪。
俊樺