鼠王芬以追打過街老鼠揚名江湖，呢期轉戰超臭避風塘，最新敵人係海水入面嘅大腸桿菌。古有大長今為皇室貴族治病，今有大腸芬為西九豪宅除臭。大腸芬嘅宏願係，終有一日，形同一潭屎水嘅避風塘變得心曠神怡，成為水上活動中心。
新油麻地避風塘毗鄰天璽、凱旋門等豪宅。大腸芬噚日拍住工程界議員何鍾泰一齊開記者會，話收到居民投訴避風塘好臭，因此請公開大學水質專家何建宗做研究，發現避風塘近雨水渠口位置，水中大腸桿菌含量達11萬個單位，比維港水質標準高出180倍，可想而知有幾污糟。
大腸芬要求政府搵出臭味來源，又建議打氧氣入污水除臭，稍後約見環保署。不過環境局局長邱騰華可能鼻塞，上周喺立法會話冇收過避風塘異味投訴。