一般做英式鬆餅（Muffin），只會聯想到甜點，原來加入創意，就可以焗出鹹鹹甜甜各式鬆餅，更可加入炒香的鮮菌以及糙米，混出煙韌中又有咬口的特色鹹鬆餅，最啱開Party一人一個大啖食！
記者︰黃家欣
攝影︰楊錦文、譚盈傑
鳴謝︰圓方出版社
V壹網：http://www.vdonext.com/index.php?fuseaction=Features.Archive&channel_id=575603&program_id=1053247
睇片即上
留言電郵：mailto:[email protected]
今日煮腦
Winnie姐
（烹飪導師、食譜作家）
自小熱愛烹飪，愛鑽研不同菜式，擅長製作點心甜品、派對糕點等，著作包括《鬆餅．批．蛋糕》、《布甸．糕．糖水》。
煮題 鹹甜派對鬆餅
攪材料快及輕手
材料攪拌時，記得要輕手，以及快捷，否則鬆餅焗出來就不鬆軟。
芝士勿拂打過度
芝士材料不可過度拂打，否則焗出來的芝士餅會出現裂紋，影響賣相。
先炒後焗更香
做鬆餅的餡料如菇菌等，必須先炒透，烘焗後才會散發出獨有香氣。
鮮菌糙米芝士鬆餅
01hr00min
製作難度：★★★☆☆
份量：12個
芝士鬆餅加入糙米，入口帶點煙煙韌韌，同時有雜菌的鹹香，食落啖啖有咬口。
材料
自發粉240克、糙米（已煮熟）/車打芝士碎各1/2杯、鮮菌（切粒）60克、葱粒2湯匙、牛油溶液120克、鮮奶250毫升、雞蛋1隻、鹽1/2茶匙
做法
1. 燒熱鑊下少許牛油，放入鮮菌粒炒香，撈起備用。
2. 將鮮奶、雞蛋、牛油拌勻，備用。
3. 將自發粉、芝士碎、糙米、鮮菌粒、葱粒、鹽，連同鮮奶漿拌勻。
4. 於鬆餅模內掃上牛油，注入粉漿至八成滿，放入已預熱至190℃焗爐，焗約25分鐘，即成。
大蒜洋葱批
01hr40min
製作難度：★★★☆☆
份量：8個
批皮夠酥脆，餡料有濃濃的洋葱甜味，伴隨蛋香，又富煙肉鹹香，味道層次好豐富。
材料
麪粉150克、牛油90克、蛋黃1隻、鹽少許、冰水3湯匙
餡料︰大蒜（切粒）100克、洋葱碎1/3杯、煙肉（切碎）2片、車打芝士碎/鮮奶/忌廉各1/2杯、雞蛋1隻、橄欖油1湯匙
調味料︰鹽1/2茶匙、黑椒粉少許
做法
1. 麪粉與鹽篩勻；牛油切粒，加入混入鹽的麪粉，用手指搓成麪包糠狀。
2. 加入蛋黃拌勻，再逐少加入冰水略搓成麪糰，靜置20分鐘。
3. 在枱上灑少許乾粉，放麪糰用擀麪杖壓薄，用水杯吸出圓形撻皮，放入已掃牛油的鬆餅模中，用叉刺孔，放入已預熱至190℃焗爐，焗20分鐘，備用。
4. 燒熱鑊放橄欖油，放洋葱碎、大蒜碎炒透，加煙肉碎炒香，最後加鹽、黑椒粉調味，放凉後加入芝士碎、雞蛋、忌廉、鮮奶拌勻成餡料。
5. 將餡料平均鋪入焗好的撻皮內，放入已預熱至190℃焗爐，焗20分鐘，即成。
蘋果蛋糕
00hr50min
製作難度：★★★☆☆
份量：8個
迷你的蘋果批，份量適中，唔會過膩，而食落香甜中帶微酸，感覺醒胃又清新。
材料
青蘋果1個、牛油/麪粉各120克、黃砂糖1/3杯、檸檬皮茸2茶匙、雞蛋2隻、發粉１1/2茶匙、肉桂粉1/2茶匙、鮮奶4湯匙、提子乾1/4杯
餅面︰杏子果醬/糖霜各1湯匙、肉桂粉1/2茶匙
做法
1. 麪粉、發粉、肉桂粉一同篩勻備用。
2. 牛油、黃砂糖打透至忌廉狀，逐隻加雞蛋拂勻。
3. 拌入粉料，將鮮奶分兩次加入拌勻，最後加檸檬皮茸、提子乾拌勻，注入已放上牛油紙的鬆餅模內。
4. 蘋果去皮、去心，切片後，放上蛋糕，放入已預熱至190℃焗爐焗25分鐘，取出後於餅面掃上杏子果醬，灑上糖霜及肉桂粉，即成。
冧酒提子芝士餅
01hr00min（不計浸酒時間）
製作難度：★★☆☆☆
份量：8個
芝士餅入口輕滑軟綿，香滑帶淡淡鹹香，夾雜粒粒有酒味的提子，有咬口之餘，更添滋味。
材料
忌廉芝士250克、雞蛋2隻、酸忌廉/提子乾各3湯匙、砂糖1/4杯、檸檬汁1湯匙、冧酒１1/2湯匙
餅底︰消化餅90克、牛油溶液60克
做法
1. 提子乾用冧酒浸一晚。
2. 消化餅用擀麪杖壓碎，加入牛油溶液拌勻，倒入已墊牛油紙的餅模內，並用匙羮壓平。
3. 忌廉芝士打至軟滑，加入砂糖拂打，雞蛋逐隻加入拌勻，再下酸忌廉打勻，倒入檸檬汁、冧酒提子，拌勻後注入餅底上。
4. 放入已預熱至180℃焗爐，焗約40分鐘，至餅面呈金黃色，待凉取出即成。
