由一班曼聯粉絲成立嘅低組別聯賽球隊FC曼聯（圖），喺英格蘭足總盃第4圈外圍賽贏咗巴魯，歷史性晉身足總盃第1圈賽事。足總盃出晒名係爆冷溫床，如果FC曼聯繼續打上去，分分鐘遇上佢哋嘅愛隊曼聯，到時班粉絲都唔知踢波先定睇偶像先！
呢隊山寨版曼聯，周日喺主場踢英足盃第4圈外圍賽，結果到下半場尾段先入波，1:0險勝對手巴魯。唔好以為呢場波冇人睇，都吸引到3千幾人入場。FC曼聯第1圈會喺11月初主場對英甲球隊羅奇代爾，低組別球隊喺足總盃時有佳作，近年米禾爾同卡迪夫城都打入過決賽，FC曼聯隨時能夠過關斬將，做巨人殺手。