台灣蘇花公路塌方，珠海旅行團旅客不幸遇上意外，家屬獲安排到台灣等候消息。呢次救災行動人命關天，中國官方新華社作出破格報道，噚日發出一張照片，赫然見到被大陸封鎖嘅《蘋果日報》在相片出現。
呢張相係拍攝珠海團領隊田園嘅家人，漏夜趕到台灣等候搜救消息，報道話田園母親不停喊住咁話：「我要女兒，我真的想女兒啊！」而喺傷心人旁邊，有一份昨日《台灣蘋果日報》同時攝入鏡頭。北京對《蘋果》一直不友善，今次官方相片《蘋果》上鏡，令人意外。今年4月「香港之子」黃福榮遇難，新華社首次引述《蘋果》報道。點解要有天災人禍，新華社先放行《蘋果》呢？