上日提及蓋特納的發言令人暫時唔睇淡美元，唔夠兩日，美元再度走弱，執筆時美滙指數又跌穿77水平，加上A股突破近日高位，兩股力量帶動期指昨升222點，但尾市由高位回落過百點，朋友笑說昨晚秋官有新劇上，點都要信吓秋官效應，但士佳相信係自我完成居多，其實從近日成交額已可感受到港股勢頭略為減弱，有人高位減貨不足為奇。
之前提及炒股不炒市應會繼續，昨日此情況頗為明顯，不少中小型股表現不俗，如超威動力（951)、天能動力（819）等電池股便齊齊飆升，見此情況惟有換馬，昨日先走了中國全通（633），將一半注碼轉至英皇鐘錶（887），一半伺機買港交所（388），並非唔睇好全通，只係市場出現輪流炒現象，唔想浪費機會，寧願等回落時再買。
英皇鐘錶升勢未盡
最近全球最大奢侈品生產商LVMH增持Hermes，令士佳記起LVMH與英皇鐘錶亦有合作，8月時LVMH透過旗下私募基金LCapital購入英皇鐘錶的可換股債券及認股權證，相信是睇中其奢侈品生意的潛力，雖然英皇鐘錶內地分銷點暫時不多，但管理層透露將會積極加大內地銷售比重，而且內地人喜歡來港買奢侈品，前景應頗正面。
五中全會雖指國家要走向「均富」，不過重點是提高中低產人士的收入，對奢侈品的消費群並無影響，英皇鐘錶股價雖已處高位，但成交仍然充足，升勢應有餘未盡。至於港交所，其利好因素本欄已曾論述，不再多談，近日調整後亦重現升勢，昨日大市上升，但由頭升到尾的大股不多，其中一隻就是港交所。一隻大價高位股加一隻細價高位股，應是攻中有守的選擇。
張士佳
筆者及客戶持有英皇鐘錶
寶來證券（香港）董事 投資服務部
mailto:[email protected]