公平競爭法條例草案係今年度立法焦點，各大政黨蜂擁加入法案委員會，總共有逾40人參加，稍後討論肯定「好熱鬧」。數人頭，建制派壓倒性佔優，所以「經濟動力」梁君彥同公民黨湯家驊噚日角逐小組委員會主席，梁君彥順理成章以21票對15票當選。代表工商界嘅梁君彥聲稱對競爭法無既定立場，言下之意係唔會偏幫對競爭法唔多like嘅工商界啩。
落選主席，湯家驊轉為改選副主席，今次輪到民建聯陳鑑林做對手，由於建制派人多，大家都以為湯家驊輸硬，點知賽果出人意表，兩人各得18票，要由梁君彥抽籤定生死，結果湯家驊死過翻生，被抽中副主席。
陳鑑林輸固然係天意，八方聽聞有啲獨立議員覺得唔好一面倒，畀個位泛民公平啲，因此湯家驊多三票。