香港嘅銀行積極發展農村市場，除咗深入農村開多啲分行，原來仲要幫農村居民起廁所！好似恒生銀行（011）咁，佢哋今年成功響雲南起咗600個沼氣廁所，數目係舊年嘅1倍，幫當地救咗大約375畝樹林，同埋減少7500噸二氧化碳排放。
查實今年已經係恒生第3次資助呢個由長春社發起嘅項目，連埋之前嗰啲，恒生響雲南省贊助興建嘅沼氣廁所有成1100個，華華聽講話有四千幾村民受惠。呢個沼氣廁所並非係新屎坑咁小嘢，佢可將糞便釋放出嚟嘅沼氣導引去產生免費能源，可以用嚟煮食同埋照明。
正所謂人人為我我為人人，你哋咁幫啲村民，第陣時入村開分行，村民一定夾道歡迎啦，分分鐘累積經驗搞埋再生能源都仲得喇！