足球先生李健和掛靴退出球壇，原來一隻腳踏咗入政壇，參加坪洲鄉事會街坊代表選舉，取得逾900票高票當選。呢次選舉喺前日舉行，由於部份候選人要求重新點票，所以民政署暫未能公佈結果，據知問題票僅一兩票，不足影響大局。
「忍咗好多年先出嚟」
和仔同八方講，當選要多謝鄉親父老、街坊好友，至於點解參選，佢火氣十足咁講，「忍咗好多年，先至會出嚟」。鄉事會選舉素來係村民小圈子遊戲，一向冇乜競爭十分和諧，坪洲鄉事會今次選舉卻火藥味濃，和仔所屬嘅陣營，挑戰以鄉事會主席林偉強為首嘅人馬，雙方各派出17個人，爭17個位，擺明單挑，激烈戰況空前。
點解村民要對綽號「小強」嘅林偉強咁大意見呢？和仔批評小強近年不能為坪洲人謀福祉，喺改善渡輪服務、興建新電台發射塔等問題上都冇諮詢坪洲人，居民惟有起義，「希望另一個領導人可以帶領得好啲」。
前日選舉投票率近五成，超過1,700人投票，和仔同多個盟友都攞到900票以上當選，壓倒性擊敗小強嘅人馬。和仔指結果反映民心所向：「老實講，今次冇乜花好大工夫拉票，坪洲超過一半以上居民唔滿意林偉強。」和仔又指，居民唔滿意小強好耐，「好多年前居民同渡輪公司有糾紛，佢都調解唔到」。
和仔熱心幫街坊做嘢，之前又拍短片撐最低工資33元，喺社運打前鋒，不過佢話唔會選區議員，今次情況特別，先至挺身而出。坪洲鄉事會共有20個委員，現時反小強陣營佔大多數，意味明年鄉事會改選後，做咗廿幾年主席嘅小強留任機會微乎其微；一旦小強失落鄉事會主席，離島區議會主席都要讓賢，鄉議局副主席個位恐怕亦難保，三失命運，指日可待。
小強大勢已去，今年初爆大鑊、頂證小強涉嫌亂開單申領公帑津貼嘅鄉事會副主席黃開榆，據講有可能取而代之。其實鄉事會權力大洗牌只係序幕，日後分豬肉，先至係戲肉。
mailto:[email protected]