有線新聞標榜「走在事實最前線」，今次颱風「鮎魚」吹侵華南，出咗名博嘅中國組記者林建誠就走咗去汕頭迎接鮎魚。
facebook上有段片，當日林建誠為展示鮎魚有幾強，揀咗一處岸邊做「扒」，當啲浪靠近時佢開始講：「層層白頭浪拍打岸邊，造成相當壯觀場面……」正喺呢一刻，一個人咁高嘅大浪由佢背後打埋嚟，畫面上即時唔見咗林建誠，好彩佢冇俾個巨浪捲走咋。
林健誠事後都好愕然，惟有一笑置之。佢現場嘅同事睇住個浪嚟緊，但冇諗到會打埋佢度，所以冇叫佢閃。今次總算有驚無險，可惜有線當日冇播出嚟，但林建誠損失咗兩部手機，其中一部係iPhone。