萬聖節有節目未？想感受吓西洋鬼節嘅氣氛，除咗落老蘭外，估唔到打機都可以過吓癮，講嘅係這隻由XBOX360獨佔嘅《FableIII》（神鬼寓言3），入面嘅人設同世界觀，就係使用奇幻式加上機械化嘅元素，怪物設計特色得嚟又唔算恐怖，最啱膽小又想過吓萬聖節癮嘅我喇！
記者：許福合
多與NPC互動
雖然這隻遊戲唔係專為萬聖節而推出，不過入面啲公仔就真係幾有萬聖節Feel，加埋音樂配襯之下，效果都幾詭異，不過當真係打起上來嘅時候，就要靠玩家自己嘅真功夫，但要留意這隻遊戲係動作RPG，換言之打得叻之餘，仲要多啲同遊戲內人物吹水，收集吓資料，方便去冒險，而對話嘅時候，會有中文字幕，而聲音方面就會用番英文，避免唔夾嘴形喇。講番故事本身，係上集《FableII》嘅50年後，因為經歷工業革命，所以在遊戲內行街嘅時候，會明顯見到較現代化，而玩家嘅目標就更高，要搞革命，推翻殘暴嘅帝王。
武器室 隨時換武器
上一集《FableII》特色之一就係互動，今集亦有保持這個玩法，當遇到NPC角色時，對話同反應都有更多選擇，有時興起仲可以拖住NPC在城巿內走兩轉，不過要留意嘅係你嘅行為會影響你嘅受歡迎程度，有機會成為好人，又或者惡霸，雖然受人厭惡，但就可以發展惡勢力。另外，上集最忠實嘅夥伴狗仔，仍然跟在身邊，可以幫你尋寶。今集仲加咗個庇護所，隨時可以按Start進入，入面有武器室，可以收藏近身武器、槍械和魔法護手，方便隨時替換；而大廳就有全國地圖，可以睇到所有城鎮資料，仲可即時迅移過去㖭！既然係XBOX360大作，當然可以玩LIVE，因為隨玩家成長，王國亦會向唔同方向發展，上LIVE就可以到朋友嘅王國參觀，亦可以合作發展同戰鬥，遊戲耐玩性同內容都豐富好多。
限定版內容：
珍藏啤牌
下載任務及限定版地域
獲得獨家武裝、衣飾
公會特別版正邪兩面錢幣
Profile
主機：XBOX360
開發商：LionheadStudios
類型：動作角色扮演
遊戲人數：1人/XBOXLIVE合作2人
系統支援：HDTV720p/1080i/1080p/DolbyDigital
推出日期：10月26日
售價：$359（標準版）/$399（限定版）
今周必玩
VANQUISH
今個星期除咗《FableIII》外，另一隻SEGA《VANQUISH》亦好值得一試。由名製作人三上真司監製，畫面方面，在外國遊戲網站受到好評。以未來世界為背景，玩家成為裝備最先進嘅美國特種戰士，操作以射擊為主，同時要配合角色靈活走位閃避，加上不時遇上大型攻擊戰艦，槍林彈雨，係一款非常緊張嘅作品。
