唐英年出任關愛基金主席後，惹起政壇滿城風雨。中聯辦副主任李剛噚日就力撐唐唐，指個基金只係政府用嚟扶貧，係一件好事，唔覺得係同「某一個人」要競選特首有關。對於陳啟宗話明唔捐，李剛就話捐錢一定要係自願，捐唔捐「取決於他（陳啟宗）自己」。
平日見到記者總係大把嘢講嘅梁振英（CY），噚日聽到「關愛基金」呢四隻字時，就同早排被問到對劉曉波獲得諾貝爾和平獎有乜睇法一樣，全程封口，一句不答，但入場後就同李剛密斟。同場嘅霍震寰就話要開會研究後，至決定捐唔捐錢，但就好坦白咁話個基金一定同唐唐選特首無關，「因為可以喺特首選舉投票嘅人，都唔係要受助於呢個基金嘅人」。