上個禮拜內地突然宣佈加息，咁啱之前敏妮收到公關V嘅SMS，問恒生銀行（011）隻人民幣債券基金買唔買得過。佢話買嚟放埋一邊抗通脹，當係師奶恩物。喺答佢隻基金買唔買得過前，敏妮第一時間同佢講，投資千祈咪諗住買咗之後放埋一邊，嗰啲幾年後突然喺櫳底摷番，升咗幾倍嘅例子，未必發生喺每個人身上。
認購費管理費 賺蝕都要畀
訓話完，言歸正傳。恒生呢隻人債基金，雖然開售前突然減認購費，但都要畀0.5%，仲有每年管理費最高0.75%，唔理賺蝕已經要畀1.25%，10萬就要畀1250蚊。雖然認購費只係起初畀一次，但管理費就年年畀。當然如果基金經理可以為客戶帶嚟吸引回報，畀管理費好應份，但人債基金冇往績睇，冇保證。
近期越嚟越多人民幣零售債券，睇好人債，想買可以自己直接買，由於人民幣升值機會點都大過貶值，唔係中途沽出，點計都應該賺，穩陣派亦唔一定需要信專業基金經理。
不過，以最近推出嘅國開行人債為例，年息2.7厘，lock成3年，仲要畀認購費0.15厘。家陣人民幣唔單止幣值升，連息率都升，買債券不如做定存，起碼彈性都大啲。
敏妮就寧願簡簡單單做定存，嫌香港銀行提供嘅人民幣定存息率唔吸引，咪返內地做囉。內地人民幣定存1年都已經收2.5厘息，唔使收認購費、管理費，淨係搭程車返去開個戶口，之後已經可以透過網上銀行處理賬項。正如契大佬Kenny話齋，敏妮喺尖沙嘴去深圳，快過入天水圍。使鬼好似債券咁，認購申請又唔知認購到幾多，又或者買基金又驚個基金經理唔生性咩！
溫敏妮
http://wanmanli.com/blogs/