世界上好多大球會都係表面風光，但其實就有唔少債務未清，西甲勁旅巴塞隆拿就係其中之一。為開發新財路幫補吓，巴塞會方最近就諗到一條好計，就係開放主場魯營畀球迷搞婚禮。喺球場搞婚禮已經夠過癮，會方仲話可以搵埋班巴塞一線球員做嘉賓，如果有美斯、沙維同佩奧爾班球星出席你個婚禮，都咪話唔威！聽啲巴塞高層講，喺魯營搞婚禮嘅新人可以按自己喜好佈置球場同揀佢哋鍾意嘅酒席，完成婚禮後仲有紀念品收番。聽講已經有唔少新人預訂咗喺魯營拉埋天窗，其中有一對新人話想喺佢哋嘅大日子，喺魯營鋪滿黃色玫瑰大宴親朋，真係諗起都覺得靚爆，各位香港嘅巴塞迷都不妨諗諗佢！