世茅又開會啦！華華唔係打錯字，因為華華講緊嘅WTO唔係世界貿易組織，而係世界茅廁組織（WorldToiletOrganization）﹗
聯合國估計，現時全球有26億人冇乾淨茅廁用，以每個家庭平均5個人計算，總共就需要5億個茅廁。有個叫JackSim嘅新加坡佬覺得呢個市場有前景，於是就係2001年成立咗世茅啦！喺佢嘅努力推動下，世茅喺全球58個國家已經有235個組織會員，雖然大部份都係民間組織，但佢話「錢途」無限。
之前，世茅嘅茅廁專家就設計咗批平價茅廁，每個成本32蚊美金，諗住喺柬埔寨賣，測試市場反應，估計兩年嚟賣咗幾萬個，反應叫唔錯，下一步佢地話會搞大佢，推出較易複製嘅特許經營版茅廁。
世茅月底會喺費城開第9屆會員大會，話題包括茅廁設計生態學同茅廁經濟學，仲邀請到著名顧問公司麥肯錫嘅專家一齊開Talk，講衞生同創意資本主義，真係名副其實嘅「度屎坑橋」。