唔少人都知，股神畢菲特得閒都鍾意喺中國市場尋吓寶，佢入股嘅公司通常都會引起市場哄動，佢入股嘅股份通常都會爆升，比亞迪（1211）就係實例，但係唔覺唔覺，原來同股神老友鬼鬼嘅蓋茨（圖）都有喺內地股市尋寶。不過，佢哋揸嘅股份表現就好唔同囉。
上個星期兗煤（1171）公佈第3季業績，當華華翻閱公司盤數嗰時，赫見原來蓋茨旗下慈善基金係公司股東之一，揸成550萬股咁多，佔股權比例都有0.11%。翻查紀錄，原來蓋茨慈善基金喺09年已經買入兗煤，當時少少哋只係入咗300萬股，之後不斷增持至家嘅550萬股。
其實呢個慈善基金一路都對內地股票情有獨鍾，截至今年6月底，已持有17間內地上市公司嘅股份，除兗煤外，仲有新買入嘅中國中鐵（390），不過就全部係揸A股，唔似畢菲特揸嘅係H股囉。