高中學制四改三，今年嘅末代會考多達12.7萬人參加。成績已經喺8月初放榜，但考評局今日起會向考生發放會考證書。考評局之前講過，想送啲禮物畀班末代考生，局方最後決定一人送一個紀念套，用嚟存放張證書，惟由於資金所限，個套唔係膠嘅，係用紙皮做。
考評局話，之前諗過送紀念郵票等等嘅禮物，但唔係咁易，而且成本太高；之後諗過送個框，畀考生裱起張證書掛喺牆，但未必受歡迎，「有啲人成績唔好，未必想擺出嚟」；連送襟章都諗過，但認為唔實用。
明年補考冇嘢送
後來諗起以前發證書畀考生時都會夾住張硬卡紙，於是諗到將張卡紙設計成一個套，再加上一啲會考歷史，用嚟夾住張證書，對考生有紀念性又實用。至於個套用幾多錢，考評局唔肯講，但八方估計都要十萬八萬。不過嗰啲全部科目缺席或攞U「揸兜」嘅考生就冇證兼冇套。
由考評局接辦嘅中學會考，今年係第33屆，總共有457萬人次考過。明年雖然會有一次終極補考，但只限自修生報名，唔算正宗末代，所以明年唔會再有紀念品。