網上電台「青台」總監楊匡上星期四被判襲警罪成，入獄14日。一啲社運界戰友連日來同楊匡同步斷食，早排喺中聯辦外開香檳噴到保安而被捕嘅葉浩意（阿橙），前日更拉隊去荔枝角收押所外，準備靜坐到楊匡放監為止，「與坐監嘅人同坐監，與受苦嘅人同受苦」，以示聲援。
懲教署：囚犯待遇平等
不過，阿橙噚日聽聞楊匡今日可能轉去壁屋監獄，質疑當局有心為難楊匡，因為楊匡刑期剩低唔夠10日，仲要轉嚟轉去。喺保衞皇后碼頭行動中被控襲警而入獄四個月嘅馬楚明，曾經喺壁屋服刑，佢話同荔枝角收押所比，壁屋「伙食起碼差一半，夜晚食過期麪包」，而且犯人頻頻開片，「懲教署啲人都嚇到騰晒雞」。長毛梁國雄今日會同律師向懲教署了解情況，睇吓收押所係咪咁爆一定要楊匡走。
懲教署就回應話，住喺荔枝角收押所嘅都係疑犯，一經定罪，署方就會按其刑期長短及各監獄嘅空位情況，安排犯人去唔同監獄服刑。署方堅稱壁屋環境唔會特別惡劣，所有在囚人士待遇平等。
有懲教人員話，低度設防嘅壁屋監獄通常收容刑期較短同初犯嘅成人犯，喺入面主要做洗衣工作；相對嚟講梗係冇收押未定罪疑犯嘅荔枝角自由度大，但正常情況下定罪犯唔會留喺荔枝角，通常犯人被判刑第三日，署方就會開board決定個犯去邊度，仲話過去長毛有得留喺荔枝角係好特殊嘅例子。
無論如何，今次判決引起好大迴響。阿橙同女長毛雷玉蓮佢哋前日去咗灣仔警察總部個報案室報案，因為6月9日喺中聯辦外指揮嘅幫辦陸毅東，當時高呼「我唔理，家有人亂拋垃圾，總之舉起手，就搵人（警察）執咗嚿豆腐」。裁判官裁定阿陸幫辦落咗個法律上唔恰當嘅命令。
女長毛報案 場面雷人
蓮姐報警時話，個命令一出，「屈警察（指女警屈思韻）」就㩒住佢隻手，嚿豆腐仲爛埋，楊匡見警方無理阻礙示威仲破壞示威物品，想睇吓女警個編號以作投訴，點知班警察將佢推埋一邊，女警仲報稱被抓傷。蓮姐報警時同落口供嘅Madame講，「你哋個同事係名副其實嘅屈警察」，場面雷人。
mailto:[email protected]