高志森監製兼執導過《我和春天有個約會》電影和舞台劇，對於湖南衛視請來陳銘章導演拍攝的電視版，前日拍攝一場爆破場面出了意外，導致兩演員任家萱（Selina）和俞灝明被火嚴重灼傷，高志森昨日批評拍爆破鏡頭沒必要，導演罔顧演員安全，完全是沒腦袋。
杜國威編劇、陳銘章執導的內地版《我和春天有個約會》電視劇前日拍攝爆破場面出意外，兩名演員任家萱（Selina）和內地演員俞灝明受重傷，高志森曾經監製和執導過該劇的電影和舞台劇版，所以他自言對這個劇相當熟悉，昨日他接受電話訪問說：「我唔明一個講女人感情嘅女性文戲，為乜要搞爆破場面，而且搞爆破又唔做好安全措施，搞到演員受傷，呢個導演好低手、冇腦。」
杜國威指情節需爆破
高志森認為拍戲是假的，縱使要拍爆破鏡頭，也可以用鏡頭遷就，不必要把演員與爆破點拉得太近，他說：「如果畀我拍呢啲場面，我唔會畀演員同爆破點拉得太近，因為點都要顧及演員安全，其實用鏡頭係可以唔近都拉到好近，呢位導演係罔顧演員安全，搞到演員受傷實在沒必要，炸藥提早爆，即係話呢個劇請番嚟掌握爆破技術嘅人員唔夠料啦。」
至於杜國威作為內地版《我》劇的編劇，他透露該劇確是有很多爆破場面，因為內地版的故事背景改了在20至30年代，昨日他接受電話訪問說：「因為故事背景改喺20至30年代日本侵華期間，所以會有幾多爆破場面，好似走難、空難都要拍爆破鏡頭，不過呢套劇我寫完個劇本，後來製作單位又唔知點樣賣咗畀內地，後期正式拍攝時，我已經冇再理喇！」
江華慨嘆演員搵命博
江華曾經與鄧萃雯拍過亞視版的《我》劇，當時該劇一樣有不少爆破場面，江華飾演沈家豪，俞灝明也是演同一個角色，對於俞灝明沒他幸運，江華說：「我拍呢套劇時，一樣有好多爆炸場面，一樣係搵命博，完全冇乜安全措施，只不過我哋比較好彩冇受傷。Selina同俞灝明就冇咁夠運，由於電視製作成本有限，有時真係好難請啲爆破專家嚟搞爆破場面，所以出意外機會係比較大，所以有時演員拍戲搵食都係好無奈，要搵命嚟玩。」
採訪：葉雪
