《反3》公仔箱大考驗　霓虹新色螢爆

暑假時《反斗奇兵3》勢頭有幾勁？睇吓票房、周邊產品，完全可以Feel到佢嘅氣勢衝住嚟。事隔兩個月，DVD、Blu-ray、Boxset再一湧而出，相信又會再掀起大家嘅話題，呢鑊真係「唔買都要睇吓！」

記者：符樂

多種色系畫面考驗

要試畫面，好多人揀卡通片！貪佢顏色夠突出，《反3》都唔例外。彼思動畫、細緻位做足，今次佢哋喺顏色構圖上，更落咗唔少工夫；例如將方角枱凳變圓角枱，話要營造愉快的氣氛云云。當巴斯一行人，被送到陽光託兒所，場景由藍、綠色為主調，色系偏粉，顏色變化大，深淺明暗一目了然，好考你屋企部「公仔箱」嘅顯示能力。另外，壞蛋玩具在零食售賣機頂部開賭檔，霓虹燈的螢光色，莫說是一般電影，就連卡通片都幾少見。

■壞蛋玩具的賭檔，以大富翁貨幣作賭注。

■託兒所粉色系列，氣氛和諧。

■雜物架滲入的陽光，會一路行、一路變化。

■色彩、輪廓深刻，令畫面感覺更立體。

Bonus大堆頭

影碟加特別收錄已成例牌動作，但罕見如《反3》大堆頭！這些片段分為兩部份，「反斗奇兵」及「彼思」。「反」部份最意想不到是導演及監製電影旁白解說，講足個幾鐘呢！電影中最為人津津樂道者，是巴斯光年跳西班牙舞，花絮入面解構原來是由真人大師示範，再跟住畫o架！
「彼」方面，有短片《日與夜》及製作特輯，入過戲院都應該睇過。另外仲有3個攝影棚趣味軼事，仲會拎導演李安烈治（LeeUnkrich）的長髮開玩笑。

■動畫製作人員竟然畫了多達10萬幅故事畫。

■安仔不是突然長大，是一步步成長！

三百角色考眼力

《反3》故事講安仔已長大、要上大學，終須同一眾玩具講ByeBye，小記親見戲院內唔少人睇到眼濕濕！十年間，紅了胡迪、巴斯光年，更有唔少配角跑出，例如「三眼仔」，由第一集的大茄，到第二集有對白，到第三集更成為救咗一眾玩具的英雄。《反3》共有302個角色，有過氣卡通人物，亦有明日之星。新成員「青豆仔」，戲份唔多，但外表淘氣可愛率先跑出；Ken及Barbie經典人物，《反斗奇兵3》後似有鹹魚翻生之勢。