因為襲擊前度女友，而被勒令暫時與隊長路蘭同住嘅紐卡素前鋒安祖卡路爾（圖），睇嚟想安寢都幾難。日前佢嘅座駕泊喺路蘭屋企外，結果俾人惡意破壞，仲搞到燒車，結果佢部落地冇幾耐嘅新車就報銷。雖然警方現時仲調查緊點解安祖卡路爾會被燒車，但初步估計同佢打前度女友嘅案件有關，好大機會遭人報復，怕且呢位英格蘭前鋒出入都要小心啲。