在唐英年家族公司打工嘅工業界立法會議員林大輝，一直被冠以唐英年「家臣」、「家僕」稱號，佢一直對此欣然受落，但隨着特首賽開跑在即，林大輝忽然同唐唐劃清界線，噚日話「家臣」、「家僕」呢啲稱呼，「反映唔到我嘅地位同位置」。林大輝話，指外界好多時指唐唐係佢老闆，實情當年請佢入唐家間半島針織廠打工嘅唔係唐唐，而係唐唐伯爺，「係佢老竇（唐翔千）請我」。林大輝又話入半島時，唐唐都「未有房坐」，反而佢自己就係「受人尊重嘅機器維修技術員」。
組「C18」聯盟或明年參選
太子爺幫屋企做生意，即係打風流工啫，林大輝卻話唐唐當年任職公司營業部，「出身都係由基層上去」，之後先接棒做話事人，待太子登基，「我先過戶跟佢（唐英年）」。唐唐91年做立法局委任議員，放低家族生意，林大輝就做埋唐英年嗰份，因此佢強調自己唔係家臣，「我哋係屬於生意夥伴，係公司同事關係」。
點解林大輝忽然要同老闆咁計較呢？八方請教政圈高人，有人咁樣分析，林大輝拉攏多個區議員組成「C18」聯盟，出年可能參選，被認定係高官家臣，對選情未見得有好處，因此要保持一定距離，不過事不離實，同唐家打工，始終都係佢嘅人啦。
講到底林大輝都好撐老闆，近日好多人質疑唐唐打理關愛基金另有所圖，林大輝話人在江湖，「真係做又難，唔做又難」。八方唔係唔同意林大輝咁講，但話時話，冇人逼你做喎。林大輝繼續為唐唐講好話，指唐唐已經將人生黃金二十年貢獻香港，「佢由91年開始做立法會，成廿年擺落去，唔係淨係靠幸運，幸運唔會追隨你廿年，你都唔可以廿年都中六合彩咁好運啦」。
用學生成績唔好做比喻
身為校監嘅林大輝又指，學生成績唔好，唔可以隨便指個學生蠢，「間學校教得好唔好呀？學校嘅配套設施好唔好呀？可能係學校環境唔好，入面又打樁，成日嘈喧巴閉，出面又有黑社會等住踢你入會，好多因素」。林大輝弦外之音，唔通係想話港府似間Band5學校，教壞唐唐？
mailto:[email protected]